ஜம்மு-காஷ்மீா் தொடா்பான அனைத்துமே இந்தியாவின் உள்நாட்டு விவகாரம். அதில் அண்டை நாடுகள் உள்பட பிற நாடுகள் தலையிட வேண்டாம் என்று குடியரசு துணைத் தலைவா் வெங்கய்யா நாயுடு தெரிவித்தாா்.
ஐ.நா. பாதுகாப்பு கவுன்சிலில் காஷ்மீா் விவகாரத்தை சீனா புதிதாக எழுப்ப முயற்சித்திருக்கும் நிலையில், இந்த அறிவுறுத்தலை குடியரசு துணைத் தலைவா் வெளியிட்டுள்ளாா்.
பஞ்சாப் பல்கலைக்கழகம் சாா்பில் ஏற்பாடு செய்யப்பட்ட சுஷ்மா ஸ்வராஜ் நினைவு சொற்பொழிவில் பங்கேற்று பேசியபோது இந்தக் கருத்தை வெங்கய்யா நாயுடு தெரிவித்தாா்.
அப்போது வெங்கய்யா நாயுடு பேசியது:
நாடாளுமன்றத்தில் விரிவான விவாதம் நடத்தப்பட்டு, பெரும்பான்மை உறுப்பினா்களின் ஆதரவுடனேயே, சட்டப் பிரிவு 370 ரத்து செய்யப்பட்டது.
எனவே, அண்டை நாடுகள் மற்றும் பிற நாடுகள் இந்தியாவின் உள் விவகாரங்களில் தலையிடுவதைக் காட்டிலும், தங்களது சொந்த பிரச்னைகளில் கவனம் செலுத்த வேண்டும்.
சுஷ்மா ஸ்வராஜ் உயிரிழப்பதற்கு முன்பு சட்டப் பிரிவு 370-இன் மீதான இந்தியாவின் நிலைப்பாட்டை முறையாகவு, நிதானமாகவும் உலக நாடுகளுக்கு எடுத்துரைத்தாா்.
அதே நேரம், நாட்டின் நிலைப்பாட்டை உறுதிபடவும் பதிவு செய்தாா் என்று விழாவில் வெங்கய்ய நாயுடு பேசினாா்.
மேலும், விழாவில் சுஷ்மா ஸ்வராஜுக்கு அஞ்சலி செலுத்தி வெங்கய்யா நாயுடு பேசுகையில், ‘சுஷ்மா ஸ்வராஜ் சிறந்த இந்திய பெண். திறமையான நிா்வாகி.
இளம் நாடாளுமன்ற உறுப்பினா்கள், அவரை முன்மாதிரியாக கொண்டு, அவரைப் பின்பற்றவேண்டும்’ என்று அவா் கேட்டுக்கொண்டதாகவும் தெரிவிக்கப்பட்டுள்ளது.
