தந்தை பெரியாரை பாஜக இழிவுபடுத்திப் பதிவிட்டிருந்த கருத்தை நீக்கியதைத் தொடர்ந்து, அந்த சம்பவத்திற்குக் கண்டனம் தெரிவித்து ஸ்டாலின் ட்வீட் பதிவிட்டுள்ளார்.
தமிழ்நாடு பாஜக பரபரப்பை ஏற்படுத்த அவ்வப்போது சர்ச்சைக்குரிய கருத்துகளை வெளியிடுவதை வாடிக்கையாக கொண்டுள்ளது.
குறிப்பாகத் திராவிட சிந்தனைகளை இழிவாகப் பேசியும், திராவிட சிந்தனைகளைப் புகட்டிய பெரியாரை விமர்சித்தும் வருகிறது.
அதன் தொடர்ச்சியாக இப்போது பெரியாரைத் தலைவர் எனக் கூட கருதாது, அவரை மிகவும் கீழ்தரமாக விமர்சித்துள்ளது.
பெரியாரின் மனைவி மணியம்மையை மகள் எனக் குறிப்பிட்டும், பெரியாரைக் குழந்தைகள் காமுகன் எனச் சித்தரித்தும் ட்விட்டரில் பதிவு ஒன்றை இட்டுள்ளது.
இதைப் பதிவிடப்பட்ட சில நிமிடங்களில், பாஜக ஐடி பிரிவு சம்பந்தப்பட்ட ட்வீட்டை பகிர்ந்தது. பதிவு வெளியான சில நிமிடங்களில் பாஜக பதிவை நீக்கிவிட்டது.
இந்நிலையில் பாஜகவின் இந்த கருத்துக்குக் கண்டனம் தெரிவித்தும், பதிவை நீக்கியது தொடர்பாக விமர்சித்தும் திமுக தலைவர் ஸ்டாலின் தனது ட்விட்டர் பக்கத்தில் கருத்து ஒன்றைப் பதிவிட்டுள்ளார்.
அந்த பதிவில் ஸ்டாலின், “பாஜக இழிவுபடுத்தும் கருத்தைப் பதிவு செய்து, எதிர்ப்பு வந்ததும் நீக்கியுள்ளது அப்பதிவைப் போடுவதற்கு முன் யோசித்திருக்கலாம். பாஜகவுக்கு அந்த பயம் இருக்கட்டும்; மரணித்த பிறகும் மிரள வைத்துள்ளார் பெரியார்; அதிமுக, இதற்காவது புலியாகப் பாயுமா இல்லை மண்புழுவாய் பதுங்குமா??” எனக் கேள்வி எழுப்பியுள்ளார்.
