விஜய் நடித்த மாஸ்டர் படம் நாளை வெளியாகவுள்ள நிலையில் அதன் சில காட்சிகள் இணையத்தில் கசிந்துள்ளன. இதையடுத்து படக்காட்சிகளைச் சமூகவலைத்தளங்களில் பகிர வேண்டாம் என இயக்குநர் லோகேஷ் கனகராஜ் கோரிக்கை விடுத்துள்ளார்.
பிகில் படத்துக்குப் பிறகு மாநகரம் பட இயக்குநர் லோகேஷ் கனகராஜ் இயக்கத்தில் நடித்துள்ளார் விஜய்.
மாஸ்டர் என்று பெயரிடப்பட்டுள்ள இந்தப் படத்துக்கு இசை – அனிருத். விஜய், விஜய் சேதுபதி, மாளவிகா மோகனன், சாந்தனு, ஆண்ட்ரியா, அர்ஜுன் தாஸ் போன்றோர் நடித்துள்ளார்கள்.
கரோனா அச்சுறுத்தல் காரணமாக, திரையரங்குகள் எட்டு மாதங்களாக இயங்கவில்லை. இதனால் மாஸ்டர் படத்தின் வெளியீடு ஒத்திவைக்கப்பட்டது.
நாளை முதல் திரையரங்குகளில் வெளியாகிறது. மாஸ்டர் படத்தின் முதல் நாள், முதல் காட்சியைப் பார்க்க ரசிகர்கள் ஆர்வத்துடன் முன்பதிவு செய்து வருகிறார்கள்.
மாஸ்டர் படத்தைச் சட்டவிரோதமாக இணையதளங்களில் வெளியிட தடை விதித்து உயர்நீதிமன்றம் உத்தரவிட்டுள்ளது.
இந்நிலையில் மாஸ்டர் படத்தின் சில காட்சிகள் இணையத்தளங்களில் கசிய விடப்பட்டுள்ளன.
இதைக் கண்டு படக்குழு அதிர்ச்சியடைந்துள்ளது. இதையடுத்து மாஸ்டர் பட இயக்குநர் லோகேஷ் கனகராஜ் ட்விட்டரில் தெரிவித்ததாவது:
ஒன்றரை வருடப் போராட்டத்துக்குப் பிறகு மாஸ்டர் படத்தை உங்களுக்கு வழங்கவிருக்கிறோம். நீங்கள் திரையரங்குகளில் படத்தை ரசிப்பதற்காகத்தான் அத்தனையும் செய்துள்ளோம்.
கசிய விடப்பட்டுள்ள மாஸ்டர் படக்காட்சிகளைச் சமூகவலைத்தளங்களில் பகிர வேண்டாம். ஒருநாள் காத்திருங்கள். அதன்பிறகு மாஸ்டர் படம் உங்களுக்கானது என்றார்.
