ஜகமே தந்திரம் படம் நேரடியாக OTT-யில் ரிலீஸ் ஆகிறது என பரவிய செய்தி வதந்தி என இயக்குனர் தெரிவித்துள்ளார்.
தற்போது தமிழ் சினிமா ரசிகர்கள் அனைவரும் மிகவும் ஆவலுடன் காத்திருக்கும் படங்களில் ஜகமே தந்திரம் படமும் ஒன்று. தனுஷ் மற்றும் கார்த்திக் சுப்பராஜ் இருவரும் கூட்டணி சேர்ந்துள்ள இந்தப் படம் ஷூட்டிங் முடிந்து போஸ்ட் புரொடக்ஷன் பணிகளும் கிட்டத்தட்ட முடிந்து விட்டது எனலாம். லண்டனில் தான் இந்த படத்தின் பெரிய பகுதி ஷூட்டிங் நடைபெற்றது என்பது குறிப்பிடத்தக்கது.
இந்த படத்தில் தனுஷ் இரண்டு விதமான கெட்டப்பில் நடித்துள்ளார். ஒன்றில் பெரிய மீசை வைத்து இருந்தார் அவர். இந்த புகைப்படங்கள் பல மாதங்களுக்கு முன்பு வெளியாகி வைரலாகி இருந்தன. அதனால் தனுஷ் இதில் இரட்டை வேடங்களில் நடிக்கிறாரா என்கிற கேள்வியும் ரசிகர்களின் மனதில் எழுந்திருந்தது.
மே ஒன்றாம் தேதி உழைப்பாளர் தினத்தன்று ஜகமே தந்திரம் படம் ரிலீசாகும் படக்குழு முன்பு அறிவித்து இருந்தது. ஆனால் மார்ச் மாத இறுதியிலேயே கொரோனா வைரஸ் அதிகம் பரவ துவங்கிய காரணத்தினால் நாட்டில் உள்ள அனைத்து தியேட்டர்களையும் கூட அரசு உத்தரவிட்டு விட்டது. அதனால் இந்த படத்தை ரிலீஸ் செய்ய முடியாத சூழ்நிலை ஏற்பட்டது. மேலும் மீண்டும் தியேட்டர்கள் திறக்க ஒரு சில மாதங்கள் ஆகலாம் என்கிற நிலை உள்ளது. தமிழ்நாட்டில் குறிப்பாக சென்னையில் கொரோனா வைரஸ் தொற்று மிக அதிக அளவில் நாளுக்கு நாள் உயர்ந்து வருகிறது. அதனால் சினிமா தியேட்டர்கள் திறக்கப்படும் வாய்ப்பு இந்த வருடம் கிடைக்குமா என்பது சந்தேகமாக இருப்பதாக சினிமாத்துறையினர் ஒரு சிலர் பேசிக் கொள்கின்றனர்.
இப்படி ஒரு சூழ்நிலையில் சில தயாரிப்பாளர்கள் தங்கள் திரைப்படங்களை நேரடியாக ஓடிடி இணையதளத்தில் வெளியிட முயற்சி செய்து வருகின்றனர். ஏற்கனவே ஜோதிகா நடித்த பொன்மகள் வந்தாள், கீர்த்தி சுரேஷ் நடித்த பென்குயின் ஆகிய படங்கள் OTTயில் ரிலீஸ் ஆகி விட்டன. யோகி பாபு நடித்துள்ள காக்டெயில் படமும் நேரடி ஓடிடி ரிலீஸ் ஆகின்றது. அந்த வரிசையில் ஜகமே தந்திரம் படத்தினையும் நேரடியாக ஓடிடி இணையதளத்தில் ரிலீஸ் செய்ய பேச்சுவார்த்தை நடந்து வருவதாக சமீபத்தில் இணையத்தில் செய்திகள் பரவியது. தனுஷும் இதற்கு ஒப்புதல் வழங்கி விட்டார் என்றும் தகவல் பரவியது.
ஆனால் அது முற்றிலும் வதந்தி என இயக்குனர் கார்த்திக் சுப்புராஜ் தற்போது தெரிவித்துள்ளார். ஜகமே தந்திரம் படம் தியேட்டருக்கு எடுக்கப்பட்டது என்றும் அது நிச்சயம் தியேட்டரில் தான் வெளியாகும் என்றும் கூறியுள்ள அவர் ஓடிடியில் ரிலீஸ் செய்யும் எண்ணம் இல்லை என்று கூறி உள்ளார்.
இதன் மூலமாக ஜகமே தந்திரம் பற்றி பரவியிருந்த மிகப்பெரிய ஒரு வதந்திக்கு அவர் முற்றுப்புள்ளி வைத்துள்ளார்.
ஜகமே தந்திரம் படத்தில் பிரபல ஹாலிவுட் நடிகர் ஜேம்ஸ் காஸ்மோ என்பவர் முக்கிய ரோலில் நடித்துள்ளார். அவர் கேம் ஆஃப் த்ரோன்ஸ், டிராய், பிரேவ் ஹார்ட் உள்ளிட்ட பல படங்களில் நடித்தவர் என்பது குறிப்பிடத்தக்கது.
ஐஸ்வர்யா லக்ஷ்மி இந்த படத்தின் ஹீரோயினாக நடிக்க, ஜோஜு ஜார்ஜ், கலையரசன், சஞ்சனா நடராஜன் உள்ளிட்ட பல நடிகர்கள் முக்கிய ரோல்களில் நடித்து உள்ளனர்.
