சூரரைப் போற்று பட ட்ரெய்லர் சூர்யாவின் பிறந்தநாள் அன்று வெளியாகலாம் என தகவல் பரவி வருகிறது.
சூர்யா நடிப்பில் சென்ற வருடம் இரண்டு படங்கள் வெளிவந்து இருந்தது. செல்வராகவன் இயக்கத்தில் என்ஜிகே மற்றும் கே.வி. ஆனந்த் இயக்கத்தில் காப்பான் ஆகிய படங்கள் ரிலீசாகி இருந்தன. இந்த இரண்டு படங்களுக்கும் கலவையான விமர்சனங்கள் கிடைத்திருந்தது. இந்த படத்தை தொடர்ந்து சூரரைப் போற்று என்ற படத்தில் நடித்து முடித்துள்ளார் சூர்யா.
இறுதிச் சுற்று புகழ் இயக்குனர் சுதா கொங்கரா இயக்கியுள்ள இந்த படத்தின் ஷுட்டிங் முழுமையாக முடிந்து விட்டது. யு சான்றிதழ் பெற்று இந்த படம் ரிலீஸுக்கு தயாராக இருக்கிறது. இந்த படம் கடந்த ஏப்ரல் மாதமே ரிலீஸாகும் என எதிர்பார்க்கப்பட்டது. ஆனால் அதற்கு முன்பே கொரோனா வைரஸ் தொற்று பரவியதால் தியேட்டர்கள் மூடப்பட்டு விட்டது. அதனால் ரிலீஸ் செய்ய முடியாத சூழ்நிலை தான் உள்ளது. பெரிய ஹிட் கொடுக்க முடியாமல் திணறி வரும் சூர்யாவுக்கு இந்த படமாவது கைகொடுக்குமா என்று ரசிகர்கள் மிகுந்த ஆவலுடன் காத்திருக்கின்றனர்.
அதனால் சூரரைப் போற்று படம் தமிழ் சினிமா ரசிகர்கள் தற்போது அதிகம் எதிர்பார்க்கும் படங்களில் ஒன்றாக இருக்கிறது. இந்நிலையில் வரும் ஜூலை 23ஆம் தேதி சூர்யா தனது 44வது பிறந்தநாளை கொண்டாட உள்ளார். அதனைக் கொண்டாட தற்போதே சூர்யா ரசிகர்கள் சமூக வலைத்தளங்களில் போஸ்டர்கள் உள்ளிட்டவற்றை தொடர்ந்து பதிவிட்டு வருகின்றனர். இந்நிலையில் சூர்யா ரசிகர்களுக்கு அவரது பிறந்த நாள் அன்று ட்ரீட் கொடுக்கும் விதமாக சூரரைப் போற்று ட்ரெய்லரை படக்குழு வெளியிட வாய்ப்பு இருப்பதாக தற்போது தகவல் பரவி வருகிறது. ஆனால் அது பற்றிய அதிகாரப்பூர்வ தகவல் எதுவும் தற்போது வரை வரவில்லை.
ஏர் டெக்கான் என்ற நிறுவனத்தை தொடங்கி ஏழை மக்களும் மிக குறைந்த செலவில் விமானத்தில் பயணம் செய்யலாம் என்கிற நிலையை ஏற்படுத்திய ஜி.ஆர் கோபிநாத் என்பவரது வாழ்க்கை வரலாறு தான் இந்த சூரரைப் போற்று படம். விமானப் படையில் பைலட்டாக இருந்து அதற்கு பிறகு தொழிலதிபராக மாறும் ஒரு நபரது கதைதான் இது.
கடந்த ஜனவரி 7ம் தேதி தான் சூரரைப் போற்று படத்தின் டீஸர் வெளியிடப்பட்டது. அது தற்போது வரை 11 மில்லியனுக்கும் அதிகமான பார்வைகளை பெற்றுள்ளது. ‘கையில் வெறும் 6,000 ரூபாயை வைத்துக்கொண்டு ஒரு ஏரோபிளேன் கம்பெனி ஆரம்பிக்க போகிறேன் என சொன்ன போது.. உலகமே எவன்டா இந்த லூசு என்று தான் பார்த்தது’ என அந்த டீசரின் தொடக்கத்தில் வரும் ஒரு வசனம் மொத்த கதையும் எப்படி இருக்கும் என்பதை விவரித்து இருந்தது. அந்த டீசரை பார்த்த பலரும் சூர்யாவின் நடிப்பை பாராட்டினார் என்பது குறிப்பிடத்தக்கது.
ஜோதிகா நடிப்பில் சூர்யா தயாரித்திருந்த பொன்மகள் வந்தாள் படம் நேரடியாக ஓடிடி இணையதளத்தில் ரிலீஸ் ஆன நிலையில், அது போல சூரரைப் போற்று படமும் நேரடியாக ரிலீஸ் ஆகுமா என அவ்வப்போது பரபரப்பாக பேசப்படுகின்றது. ஆனால் இந்த படம் நிச்சயமாக தியேட்டர்களில் தான் ரிலீஸ் ஆகும் என சூர்யா அப்போதே தெரிவித்திருந்தார் என்பது குறிப்பிடத்தக்கது.
சூரரைப் போற்று படத்தில் மோகன் பாபு, ஜாக்கி ஷெராப் ஆகியோர் முக்கிய வேடங்களில் நடித்துள்ளனர். சூர்யாவின் ஜோடியாக அபர்ணா பாலமுரளி நடித்துள்ளார். இந்த படத்திற்காக ஜீவி பிரகாஷ் இசையமைத்துள்ள பாடல்கள் ஏற்கனவே வெளியாகி நல்ல வரவேற்பைப் பெற்றிருக்கின்றன என்பது குறிப்பிடத்தக்கது.
