அமெரிக்காவில் நடைபெறும் மயாமி ஓபன் மகளிர் டென்னிஸ் போட்டியின் 4வது சுற்றில் விளையாட, நட்சத்திர வீராங்கனை பெத்ரா குவித்தோவா (செக்.) தகுதி பெற்றார். 3வது சுற்றில் இங்கிலாந்தின் ஜோகன்னா கோன்டாவுடன் நேற்று மோதிய குவித்தோவா 6-1, 6-2 என்ற நேர் செட்களில் மிக எளிதாக வென்று கால் இறுதிக்கு முந்தைய சுற்றுக்கு முன்னேறினார். மற்றொரு 3வது சுற்றில் நம்பர் 1 வீராங்கனை ஆஷ்லி பார்தி (ஆஸி.) 6-3, 6-2 என்ற நேர் செட்களில் ஜெலினா ஆஸ்டபென்கோவை (லாத்வியா) வீழ்த்தினார்.
ருமேனியாவின் சிமோனா ஹாலெப் காயம் காரணமாக விலகியதை அடுத்து, லாத்வியாவின் அனஸ்டேசியா செவஸ்டோவா 4வது சுற்றுக்கு தகுதி பெற்றார். பெலாரஸ் நட்சத்திரம் விக்டோரியா அசரென்கா தனது 3வது சுற்றில் 7-5, 6-2 என்ற நேர் செட்களில் ஜெர்மனியின் ஏஞ்சலிக் கெர்பரை வீழ்த்தி கால் இறுதிக்கு முந்தைய சுற்றுக்கு தகுதி பெற்றார். முன்னணி வீராங்கனைகள் எலினா ஸ்விடோலினா (உக்ரைன்), அரினா சபலென்கா (பெலாரஸ்), மார்கெடா வோண்ட்ருசோவா (செக்.) ஆகியோரும் 4வது சுற்றுக்கு முன்னேறி உள்ளனர்.
