லிப்ஸ்டிக் இல்லாமல் உதட்டின் அழகை அதிகரிக்க உதவும் லிப் ஆயில் தயாரிக்கும் முறை!

அழகு பராமரிப்பு என்று மொத்தமாக சொல்லிவிட்டாலும் ஒவ்வொரு உறுப்புக்கும் தனித்தனி பராமரிப்பு உண்டு. முக சருமத்துக்கு பல பராமரிப்புகள் செய்வது போன்று கண்கள், மூக்கு, வாய், உதடு என்று ஒவ்வொன்றுக்கும் தனித்தனி பராமரிப்பும் உண்டு. அந்த வகையில் உதட்டுக்கான பராமரிப்பில் உதட்டை மென்மையாக வைத்திருப்பதோடு பளபளப்பாகவும் வைத்திருந்தால் உதட்டின் வசீகரம் அதிகரிக்கும். முகத்தின் சருமம் அழகாக இருந்து உதடுகள் உலர்ந்து வறட்சியடைந்திருந்தால் அவை பார்க்க நன்றாகவா இருக்கும். முதலில் உதட்டில் வறட்சியில்லாமல் பளபளப்பாக வைத்திருக்க லிப் ஆயில் பெரிதும் உதவுகிறது. வீட்டிலேயே லிப் பாம் தயாரிக்கும் முறை குறித்து பார்க்கலாம்.
​லிப் ஆயில் தயாரிக்க தேவை
ஆலிவ் எண்ணெய் – 1 தேக்கரண்டி

வர்ஜின் தேங்காய் எண்ணெய் – அரை தேக்கரண்டி

கோகோ வெண்ணெய் – அரை தேக்கரண்டி,

பீஸ் வாக்ஸ் ( தேன் மெழுகு)- அரை தேக்கரண்டி,

வைட்டமின் இ மாத்திரைகள் – 5

ஆரஞ்சு எண்ணெய் – 5 துளிகள்,

லாவண்டர் எண்ணெய் – 5 துளிகள்,

லிப் ஆயில் ட்யூப் – 3 (கடைகளில் கிடைக்கும்)

தேவையெனில்

ரோஸ் பவுடர் – 1 டீஸ்பூன்

இவை அனைத்துமே உதடு பராமரிப்புக்கு என்பதால் இயன்றவரை தரமான பொருள்களை பயன்படுத்துவது நல்லது. அதோடு இவை குறைந்த அளவில் செய்தாலும் நீண்ட நாட்கள் வரை பயன்படுத்தவும் முடியும் என்பதால் விலை உயர்ந்த தரமான பொருள்களை மட்டும் பயன்படுத்த வேண்டும்.

​தயாரிக்கும் முறைகள்
அகலமான கண்ணாடி அல்லது பீங்கான் கிண்ணத்தில் ஆலிவ் எண்ணெய், தேங்கா எண்ணெய், கோகோ எண்ணெய் மற்றும் தேன்மெழுகு போன்றவற்றை சேர்க்க வேண்டும்.
அகலமான பாத்திரத்தில் பாதி அளவு நீர் நிரப்பி அதில் இந்த கண்ணாடி கிண்ணத்தை வைக்க வேண்டும். கிண்ணம் மூழ்காதவாறு பார்த்துகொள்ள வேண்டும். பிறகு இலேசாக சூடேறும் போது, கண்ணாடி கிண்ணத்தில் உருகி வழியும். டபுள் பாயில் மெத்தட் முறையில் உருக்க வேண்டும்.கவனம் பீஸ் வாக்ஸ் உருகாவிட்டால் அவை இறுக்கமாகி லிப் ஆயில் ஊற்றும் போது அடியில் தங்கிவிடக்கூடும். 10 முதல் 15 நிமிடங்கள் வரை அதை சூடேற்றினால் போதும்.

இப்போது வைட்டமின் இ ஆயில் மாத்திரைகளின் முனைகளை வெட்டி உருகிய கலவையில் பிழிந்தெடுக்கவும்.

பளபளப்புக்கு
எண்ணெயுடன் வைட்டமின் இ பிழிந்ததும் லிப் ஆயில் தயராகிவிடும். பிறகு சூட்டிலிருந்து எடுத்துவிட வேண்டும். லிப் ஆயில் மேற்கொண்டு பளபளப்பை கொடுக்க வேண்டும் என்று விரும்பினால் இந்த பொருள்களை அடுத்தடுத்து சேர்க்கலாம். ஆரஞ்சு சாறு. லாவண்டர் எண்ணெய், ரோஸ் பவுடர் போன்றவற்றை சேர்த்து கலக்க வேண்டும். மைக்கா பவுடர் உதட்டு லிப் ஆயிலுக்கு பளபளப்பை தரக்கூடும். ஒரு வேளை நீங்கள் பளபளப்பையும் நறுமணத்தையும் விரும்பவில்லையெனில் இந்தப் பொருள்களை தவிர்க்கலாம். அதே நேரம் நாம் கோகோ வெண்ணெய் மற்றும் தேன் மெழுகு பயன்படுத்துவதால் உதட்டின் பளபளப்பு இலேசான பழுப்பு நிறத்தை கொண்டிருக்கும். உதட்டின் பராமரிப்பு வெளியில் தெரியாமல் இருக்கும். அதனால் பளபளப்புக்கு கூடுதல் பொருள் சேர்ப்பதும் தவிர்ப்பதும் உங்கள் விருப்பமாகவே இருக்கட்டும்.

​பயன்படுத்தும் முறை
எல்லாவற்றையும் நன்றாக கலந்ததும் லிப் ஆயில் ட்யூபில் ஊற்றி 30 நிமிடங்கள் வரை குளிர்ச்சிபடுத்துங்கள். பிறகு இதை பயன்படுத்துங்கள். எப்போதெல்லாம் உங்கள் உதடு வறட்சியை சந்திக்கிறதோ அப்போதெல்லாம் இதை உதட்டின் மீது தடவி கொள்ளுங்கள். கெமிக்கல் கலப்பில்லாத, இந்த லிப் ஆயில் உங்கள் உதட்டின் வறட்சியை போக்ககூடும். எளிமையான முறையில் உதட்டை அழுகுபடுத்திவிட முடியும் போது இனி வேறு என்ன வேண்டும்.
இயற்கை பொருள்களை கொண்டு வீட்டில் தயாரிப்பதால் இவை சுத்தமானது. சுகாதாரமானது. கெமிக்கல் கலக்காதது என்பது கூடுதல் சிறப்பு.

உங்கள் கருத்துக்களை தெரிவிக்கலாமே